'O Conte 'e Mola

Antonio Guarracino

Dialettali

Né francese né spagnuolo
j' so’ nato ‘o Conte ‘e Mola,
‘na discesa sciuliarella
d’a Concordia a’ Speranzella.
A mmità ‘e chesta via
là ce steva ‘a casa mia,
steva ‘ncopp ‘o terzo piano
‘na fenesta e duje balcune,
‘nge so’ nato e ‘nge so’ stato
fino a' quinta elementare.
Mo ce passo, guard ‘ncopp’
pare, comme fosse ajere!
Nu triatro era sta via
e affacciato, stu balcone
era forse ‘o meglio palco
pe me, ch’ero nu guaglione.
Nu triatro addò ‘o scenario
sia cu scene ca persone,
iss’ sulo se cagnava,
dall’autunno a primmavera
int’a vierno e int’a staggione.
Na cummedia ‘e quasi n’anno,
era n’atto ogni staggione.
‘O scenario ‘e primmavera
era ‘o sole ca traseva
sempe ‘e cchiù pe’ dint’e case
e vedive l’aucielle ca scennavano
e saglievano, tutt’assieme po’
cantavano da’ matina fino a’ sera.
Mentre invece int’a staggione,
cu ‘e scugnizz miez’ a’ via,
tanti voci pront’ a vennere,
fiche, ceveze, mellune
acque ‘e mummera,
e ‘o surbetto ghiaccio e limone.
E po’ tanti specie 'e feste,
canti, balli. prucessioni!
Cu ‘e feneste sempe aperte
tu sentivi ogni canzone
e ‘a dummeneca,
nun m’o pozzo scurdà cchiù,
‘o prufumo fine ‘e bello
ca veneva d'o ragù!
A settembre chesta via
me pareva Piedigrotta
cu lampiune e lampiuncielle,
bandierelle, attaccate a tanti fili
‘a ringhiera de’ balcune,
mentre abbascio ‘ o scugnizziello
te faceva ‘ o cuppolone.
Po’ a uttobre, ‘o castagnaro
‘e sciuscelle ‘e cuoppe ‘e allesse.
Tutto ieve assai tranquillo
cuonce, cuonce, e senza pressa!
Ma ‘o quart’atto ero ‘o cchiù bello!
Quann’ a vierno era Natale,
me pareva e stà pur’io comme
a dint’ a nu presebio:
‘e puteche chiene ‘e rrobba,
tutte quante illuminate;
po’ ‘e nuvene ‘e zampugnare
tutt’a gente affratellata,
just’o juorno da’ vigilia
te purtavano ‘o “ canisto “
a na cesta tale e quale
chiena 'e tutto chella robba
ca se mangia pe’ natale!
Ma addò sta mo’ tutto chesto?
Stammatina pe’ sta via
n’ata vota so’ passato:
quanta gioia, quanti ricordi,
quanta e quanta nustalgia!
E me guardo là ‘o balcone:
si parlasse mo’ pur’isso
quanta e quanta cose ‘nzieme
da “ guagliune” avimmo visto!

Antonio Guarracino

03/06/2015 21:21| 1646

Opera pubblicata ai sensi della Legge 22 aprile 1941 n. 633, Capo IV, Sezione II, e sue modificazioni. Ne è vietata qualsiasi riproduzione, totale o parziale, nonché qualsiasi utilizzazione in qualunque forma, senza l'autorizzazione dell'Autore.
La riproduzione, anche parziale, senza l'autorizzazione dell'Autore è punita con le sanzioni previste dagli art. 171 e 171-ter della suddetta Legge.

Nota dell'autore:

«Nella Canzone napoletana Lily Kangy la sciantosa dice: " Chi mi piglia pe' francese, chi me piglia pe' spagnola, ma so' nata a 'o Conte 'e Mola, metta a copp' a chi vogl'j! " La stessa cosa dico anche io!»

La bacheca della poesia:

Non ci sono messaggi in bacheca.

Scrivi le tue sensazioni su questa poesia

Hai una sensazione, un messaggio, un'espressione da condividere con l'autore e gli altri lettori?
Allora scrivilo e condividilo con tutti!

9208 visitatori in 24 ore 422 visitatori online adesso

Il Servitore di due Padroni

Antonio Guarracino

'O Conte 'e Mola